خطے میں بحری امن و استحکام کے قیام میں پاک بحریہ کا کردار اہم ہے، چینی نیول چیف

بیجنگ(مانیٹرنگ ڈیسک) پاک بحریہ کے سربراہ ایڈمرل ظفر محمود عباسی نے چینی نیول چیف وائس ایڈمرل شین جِن لونگ سے ملاقات کی۔ ترجمان پاک بحریہ کے مطابق نیول چیف ایڈمرل ظفر محمود عباسی چین کے دورے پر ہیں جہاں انہوں نے چینی بحریہ کے سربراہ اور دفاعی صنعت کی اعلیٰ شخصیات سے ملاقاتیں کیں۔

بیجنگ میں واقع چین کی بحریہ کے ہیڈ کوارٹرز آمد پر چین کی بحریہ کے سربراہ وائس ایڈمرل شین جِن لونگ نے پاک بحریہ کے سربراہ کا استقبال کیا اور چاق و چوبند دستے نے انہیں سلامی پیش کی۔

ترجمان پاک بحریہ کے مطابق دونوں ملکوں کی بحری افواج کے سربراہان نے ملاقات کے دوران پیشہ ورانہ اُمور بشمول دو طرفہ بحری اشتراک اور بحرِ ہند کی سکیورٹی صورت حال پر تبادلہ خیال کیا۔

اس موقع پر دونوں بحری افواج کے مابین تعاون کے مختلف شعبوں پر بھی بات چیت کی گئی جب کہ ایڈمرل ظفر محمود عباسی کو چین کی بحریہ کے متعلق بریفنگ بھی دی گئی۔

ترجمان کے مطابق پاک بحریہ کے سربراہ نے دہشت گردی کے خلاف جنگ میں پاکستان کے عزم اور کردار بشمول میری ٹائم دہشت گردی اور بحری قزاقی کی روک تھام کے ضمن میں کثیر القومی ٹاسک فورس میں پاک بحریہ کی شرکت پر روشنی ڈالی۔چینی بحریہ کے سربراہ نے خطے میں مشترکہ بحری سکیورٹی کو یقینی بنانے کے سلسلے میں پاک بحریہ کی خدمات اور عزم کو سراہا۔

وائس ایڈمرل شین جِن لونگ نے کہا کہ پاک بحریہ خطے میں بحری امن و استحکام کے قیام میں اہم کردار ادا کر رہی ہے جو خطے میں آزادانہ جہاز رانی کے لیے محفوظ ماحول کی فراہمی میں نہایت مددگار ہے۔

قبل ازیں، ایڈمرل ظفر محمود عباسی نے اسٹیٹ ایڈمنسٹریشن فار سائنس، ٹیکنالوجی اینڈ انڈسٹری کے ڈپٹی ایڈمنسٹریٹر زُو زھانبِن سے ملاقات کی جس میں باہمی دلچسپی کے اُمور بشمول عسکری صنعت کی ترقی کے اشتراک پر بات چیت کی گئی۔

The post خطے میں بحری امن و استحکام کے قیام میں پاک بحریہ کا کردار اہم ہے، چینی نیول چیف appeared first on Iblagh News | حقائق تک رسائی اور ان کا ابلاغ.

from Iblagh News | حقائق تک رسائی اور ان کا ابلاغ https://ift.tt/2qIVSb1
via IFTTT